Санаи 21 августи соли 2025 бо ташаббуси Агентии обуҳавошиносии Кумитаи ҳифзи муҳити зист назди Ҳукумати Ҷумҳурии Тоҷикистон, дар ҳамкорӣ бо Намояндагии Ташкилоти озуқа ва кишоварзии Созмони Милали Муттаҳид (ФАО) дар Ҷумҳурии Тоҷикистон ва Фонди умумиҷаҳонии экологӣ, омӯзиш (тренинг) оид ба мавзӯи таҳлили камбудиҳо (GAP) барои таҳияи нақшаи роҳи фарогири гендерӣ баргузор гардид. Ин чорабинӣ дар доираи талаботи Чаҳорчӯбаҳои васеи шаффофият (ETF), аз ҷумла таҳияи ҳисоботи Чаҳорчӯбаҳои васеи шаффофият, Саҳмҳои дар сатҳи миллӣ муайяншуда (NDC) ва Ҳисоботҳои дусола (Biennial Transparency Reports – BTR) тибқи Созишномаи Париж амалӣ гардид.
Ҳадафи асосии омӯзиш (тренинг) таҳкими иқтидорҳо барои таҳияи нақшаи роҳи фарогири гендерии “ETF” дар асоси таҳлили камбудиҳо ва рушди низоми миллии ҳисоботдиҳии иқлимӣ арзёбӣ гардида, иқдоми мазкур ба татбиқи муътадили ӯҳдадориҳои Ҷумҳурии Тоҷикистон дар доираи Созишномаи Париж равона шудааст.
Дар ҷараёни омӯзиш (тренинг) иштирокчиён-намояндагони вазорату идораҳои дахлдор, муассисаҳои таҳсилоти олӣ ва пажӯҳишгоҳҳои кишвар бо масъалаҳои зерин шинос гардиданд:
• Таҳлили камбудиҳо (GAP) дар самти маблағгузории иқлимӣ дар Ҷумҳурии Тоҷикистон;
• Нақшаи маблағгузорӣ (малиғгузории иқлимӣ) барои татбиқи Саҳмҳои дар сатҳи миллӣ муайяншуда (ССММ/NDC).
• Нақшаи маблағгузории Стратегияи миллии мутобиқшавӣ ба тағйирёбии иқлим дар Ҷумҳурии Тоҷикистон то соли 2030;
• Нақши занон дар идоракунии устувори захираҳои табиӣ ва дигар мавзӯъҳои марбут.
Баргузории чунин намуди омӯзишҳо ҷиҳати таҳкими ҳамкориҳои байниидоравӣ, рушди низоми ҳисоботдиҳии иқлимӣ ва пешбурди баробарии гендерӣ дар самти сиёсати иқлимии миллӣ заминаи муҳим фароҳам меоварад.
22.08.2025