Рӯзи 29 августи соли 2025, бо ташаббуси Агентии обуҳавошиносии Кумитаи ҳифзи муҳити зист назди Ҳукумати Ҷумҳурии Тоҷикистон ва бо ҳамкории Намояндагии Ташкилоти озуқа ва кишоварзии Созмони Милали Муттаҳид (ФАО) дар Ҷумҳурии Тоҷикистон ва Фонди умумиҷаҳонии экологӣ, омӯзиш (тренинг) оид ба тақвияти иқтидори техникии ҷонибҳои манфиатдори кишвар баргузор гардид.
Омӯзиш ба масъалаҳои вазифа ва масъулияти ҷонибҳои дахлдор дар доираи Тартиб ва принсипҳои роҳнамоии шартӣ (MPGs) ва Чаҳорчӯбаҳои васеи шаффофият (ETF) бахшида шуда, ҳадаф аз он мусоидат ба омодасозии Ҳисоботи дусолаи шаффофият (BTR) мебошад. Дар чорабинӣ намояндагони вазорату идораҳои марбута, муассисаҳои таҳсилоти олӣ ва пажӯҳишгоҳҳои ҷумҳурӣ ширкат варзиданд.
Дар ҷараёни омӯзиш (тренинг) иштирокчиён бо мавзӯъҳои “Сиёсати Ҷумҳурии Тоҷикистон дар самти тағйирёбии иқлим”, “Шарҳи партовҳои газҳои гулхонаӣ (ГГ) аз рӯйи соҳаҳо”, “Сохтори институтсионалӣ ва ӯҳдадориҳои ҷонибҳои ҳавасманд дар доираи барӯйхатгири (инвентаризатсия)-и газҳои гулхонаӣ (ГГ)” ва дигар мавзӯъҳои марбут ба тағйирёбии иқлим ва партови газҳои гулхонаӣ шинос шуданд.
Қайд кардан зарур аст, ки ҳадафи асосии омӯзиш - баланд бардоштани сатҳи малака ва ҳамоҳангсозии фаъолияти мутахассисони миллӣ ва соҳавии кишвар мебошад. Ин фаъолият тавассути омӯзиш ва азхудкунии амалии талаботҳои таҳияи Ҳисоботи дусолаи шаффофият оид ба барӯйхатгирии газҳои гулхонаӣ амалӣ мегардад.
29.08.2025